wakas ni ate glo

(bulgar Aug. 02, 2005)

Bistado

Ma-CIARA ang pangalan

NAGBALIK na si FG Mike.
Yipeee, tuloy na naman ang juetengggg!
---$$--
UMATRAS sa pagtestigo si ex-Gov. Dy.
DY siya matapang!
---$$--
SUMASABIT ang pangalan ni Ex-Sen. Tito Sotto sa kontrobersiya.
Mukhang malaking PAPEL siyang gagampanan sa mga susunod na araw.
Huwag sanang ma-CIARA ang kanyang pangalan.
---$$--
KUMAKALAT ang epidemya ng polio sa mga kalapit na bansa.
Pag nagkataon, MALULUMPO maging ang mga taga-Malacanang.
----$$---
World’s most powerful woman si Condolezza RICE ng United States.
Kasi’y kung walang RICE magugutom ang mahigit kalahati ng world population dahil sa gutom.
-----$$--
FOURTH world’s powerful woman si Pangulong GLORIA Arroyo.
Nasa kanya kasi ang GLORIA.
-----$$---
MASYADO raw nasasaktan ang First Family sa kaliwa’t kanang intriga at expose.
ARROY-oh!
----$$---
DESIDIDO si Kris Aquino na isulong ang libel case kontra sa GMA 7.
Lalo pa siyang SISIKAT.
Yung nga lang, baka MAUNGKAT ang TULO sa kanilang bubong.
---$$--
MARAMI rin ang humuhula na makakatagal si Ate Glo sa Malacanang kahit sangkatutak ang batikos.
He, he, he, HULA lang naman!
----$$--
DAPAT ay magpahula rin ang oposisyon.
Anong malay nila, baka HULAAN naman na maaagaw nila ang Malacanang.
Kanya-kanyang HULA lang naman yan!
At least magkaroon sila ng PAG-ASA.
Kahit sa hula-hula.
---30---

editorial

AGOSTO na!
Nasira na ang hula at pagtaya ng ilang political observers at nagrurunung-runungan na babagsak ang gobyerno ni Ate Glo bago o sa pagsapit ng State of the Nation Address (SONA).
May sa pusa si Ate Glo.
Pero, ayon sa mga ekspertong numerologist, taglay ni Ate Glo ang mahiwagang No.5—ang neutral number—sa siyam na numerical figures—mula uno (1) hanggang nuwebe 9), hindi kasama ang zero (0).
Batay sa mga aklat at pagsasaliksik, ang No. 5—ay walang kakambal na numero taliwas sa No. 1 na kapatid ang No. 4; No.2 na kamukha ng impluwensiya ng No. 7; magkatulad ang epekto ng No. 3, 6, 9; samantalang ang No.8—ay kamag-anak ang grupo ng No. 1, 2, 4, 7.
Kaibigan ng No.5 ang lahat ng numero at ayon sa mga numerologists, ang mga taong nagtataglay nito tulad ni Ate Glo ay madaling maka-adapt o maka-adjust o magamay ang lahat ng klase ng pinakamaseselan o pinakamapanganib na sitwasyon!
Iyan ang dahilan kung bakit marami ring negosyante ang nagtataglay ng Mahiwagang No.5.
Nakakaranas din ng mabibilis na pagbabago ang mga No.5 person tulad ni Ate Glo na may kakaibang kapalaran sa larangan ng negosyo, paglalakbay at transportasyon.
Sa negatibong aspekto, kailangang pumili siya ng matatapat na kaibigan; at umiwas sa pagbibiyahe—dahil maaari siyang madisgrasya sa mga vehicular accident o pagsakay sa anumang klase ng transportasyon partikular sa eroplano o barko; at asasinasyon!
Anu’t anuman, mahihirapang maigupo ang No.5 person tulad ni Ate Glo, at ang kanyang kabiguan—ay magmumula lamang sa isang MALI at DISPALINGHADO personal na desisyon sa hinaharap.
Pero, kumbaga sa pelikula, suspense- thriller- horror ang kanyang magiging wakas!
----30--